Na, das isch ja lang gange, bis mal wieder öpis bloggt wird da bi eus...
Isch au Einiges gloffe sit im April, d Irene isch am schaffe und am chrampfe und am tue, damit ihri Abteilig denn au ändlich mal staht und ich bin sit vier Mönet dauernd unterwegs... Mannegschichte halt :-) also, gnauer nur eini, das langed au, bin nämlich extrem happy... und wenn ich nöd det bin, bin ich i de zwüschedzit natürlich immer chli im Stall, bi minere neuste Errungeschaft, de Smile... Aber mal langsam, de Reihe na:
D Irene hät ändlich ihres Projekt im Gschäft chöne agah und die gwünschti Abteilig ufbaue. Natürlich isch sie de Chef, das ghört sich so und sie wird das super mache (au wänn sie's mir amel nöd glaubt). Mittlerwiile isch es scho so wiit, dass näbed de übernohne Mitarbeiter au scho die erst sälber Igstellti agfange hät, nämlich gester. Herzig, richtig nervös isch sie gsi, s Ifüerigsprogramm liit sit zwei Wuche parat und gester hät sie doch ändlich mal wieder möge gaaaanz früeh ufstah, damit sie no chan go Blüemli poste für die Neu :-) Und am 1. November isch denn no die zweit Hilf i de Startlöcher. Wünsch der viel Glück, Cousine, du packsch das!
Und bi mir isch sit Ändi April au alles chli drunder und drüber und ganz offiziell sit am 1. Mai (Tag der Arbeit, hoffe, das isch es guets Omen) bekänned de Felix und ich eus schuldig, das mir eus doch rächt möged ;-)
Aber eigentlich hät das ja gar nöd i mini Plän passt, schliesslich han ich doch mit emene Ross grächnet und nöd mit emene Maa... Und det isch es denn au grad wiiter gange. Will, eigentlich han ich de Vierbeiner ja au erst nächst Jahr im Früelig planet gha, aber au da händ mer alli en Strich dur d Rächnig gmacht. Mir sind nämlich go Ross aluege, d Rosmarie, de Richie, de Felix und ich. Zerst z Frankriich ufemene Gstüt und nachher no ohni Felix au in Frankriich imene Trainingsstall. Und siehe da, da isch sie eifach uftaucht und au nüme wegg gange... d 'Miss Smiling Chic' oder eifach churz d 'Smile' oder für d Irene d 'Chicca'...
Gseht tatsächlich denah us, als wär s Läbe e Praliné-Schachtle... Mer weiss nie, was als nächsts chunt...
Life is cool... tbc! :-D
02.09.10
Kommentar schreiben